移英了，廣東話留與不留？定勉強冇幸福？

最近有同唔同嘅家長傾開偈，大家都不約而同提到自己嘅小朋友都傾向唔再講廣東話，上咗中學嘅都還好啲年紀越細就越難控制，甚至乎有家長同我講，佢哋打算放棄比小朋友學廣東話，因為勉強冇幸福。

其實嚟到英國要保留學廣東話，未必係一件咁困難嘅事情。

首先如果小朋友年紀還細，我哋可以創造有趣嘅學習環境比佢哋，家人可以同小朋友一齊透過故事、遊戲、唱歌、做手工或者繪畫等等來學習變得有趣；另外玩樂時一定要同小朋友有足夠嘅互動，比佢哋去用廣東話表達佢哋嘅興趣或者需求，如果我哋作為家長都唔堅持的話，小朋友更加唔會覺得有需要要講廣東話。

此外，我哋可以多使用多媒體資源來吸引小朋友，例如廣東話嘅電視節目、電影、卡通、遊戲嘅應用程式等等，讓小朋友喺娛樂之中學習。如果小朋友做得好嘅，不妨比小朋友鼓勵同埋獎勵：例如一啲佢鍾意食嘅小食、或者係比一個印仔佢哋，儲夠一定數量嘅印仔就可以送份小禮物比佢哋，佢哋用廣東話可以完成到相關活動嘅時候，已經可以增加到佢哋嘅學習動機。

以下為一些廣東話網上節目參考：

https://youtu.be/51uvwNsWSg0?si=zZbQmcgp1qLC9Bll

YouTube故事頻道：Teacher Owl

https://youtu.be/aB6-VVBsV_o?si=1HtBr4tUrP7POuNz

YouTube頻道：救援小英雄珀利TV

我哋亦都應該鼓勵小朋友閱讀廣東話嘅書籍、漫畫同埋故事，如果可能嘅話可以安排小朋友同其他香港人多啲互動，咁樣佢哋就可以實際應用佢哋廣東話喇！當小朋友響出邊講得好嘅時候，家長記得要多啲讚佢哋，講句：「媽咪覺得你做得好好，你好叻呀！原來你廣東話可以講得咁好個喎！」等小朋友知道原來媽咪鍾意自己講廣東話，咁佢講廣東話嘅動機又會增加。切忌周圍同外人講自己個小朋友幾唔鍾意講廣東話，我哋要嘗試多啲鼓勵佢哋。媽媽少啲去投訴、埋怨，小朋友先至會有學習動機同埋做嗰個行為嘅動機，由於過得英國嘅小朋友都係會長時間比英文熏陶，所以我哋應該要比小朋友時間去學習同埋掌握廣東話，千其唔可以比過多壓力。

當佢哋唔願意講嘅時候點算呢？

勸多一兩次都唔願意，就要比空間佢等佢冷靜一下。如果佢過一陣間肯講返，就一定要讚賞佢啦。由於我哋本身係香港人，我哋都想繼續維持返小朋友講廣東話、寫中文呢一種文化，所以我哋應該要比小朋友知道我哋每一種語言嘅價值，點樣去適當地切換，同埋應用唔同類型嘅語言。我哋日常生活夠唔駛法文、西班牙文、德文啦，點解小朋友小學甚至上中學又要學呢？我哋自己係香港人，又點解要容許小朋友唔講廣東話呢？

希望各位家長三思，幫忙保住香港人語言文化，我哋呢一代唔做，廣東話會好容易絕跡。