教與學 〔1〕- 怎樣可令子女更有信心學習？

今日同兩個Year6學生上堂，因為教緊佢哋科學生物科嘅Classification，我習慣一上堂時會同學生簡單複習上一堂學嘅嘢，recall佢哋Memory，所以就請佢哋試寫Animal Kingdom嘅Classification。

兩個學生都不約而同同我講好鍾意呢一個課題，所以就同我講話佢哋好想寫個Classification出嚟，因為佢哋有．溫．書！其實上堂都係第一次教佢哋嘅啫，響我唔叫之下佢哋自己溫書我都不知幾開心～ 

響一開始寫嘅時候，兩個學生自己分工，一個寫Vertebrate，另一個寫Invertebrate，我完全冇插手中間過程。咁樣做除咗可以俾佢哋練習溝通技巧外，亦都可以比佢哋明白到退讓的道理。

其中學生A超級有信心，好快就寫低曬個分類，而學生B就不斷喺度話「我咁樣寫到底啱唔啱呢？」望下隔離又望翻自己，好冇信心咁。然後我同佢講咗一句：「你宜家寫嘅係啱㗎，啲字串得啱，你繼續寫啦！」佢聽到之後，好快就寫曬出嚟。

學生A其實一早已經寫完個分類，我見到學生B有啲錯，所以我就問學生A有冇信心寫埋學生B嗰邊嘅分類，呢一個識寫嘅學生A就話佢想試下。

中間我冇話學生B寫錯咗，亦冇擦走學生B嘅字，而我係等學生A寫完之後，請學生B對一對佢哋兩個寫嘅有咩唔同。當佢意識到原來係自己分層分得唔正確，佢亦都會好牢牢記住原來Vertebrate有五個種類，Invertebrate就有兩個。而咁樣做，佢下一次再寫亦會多咗信心，因為今次嘅分類比咗啲回憶佢。

好多時我哋都會有強迫症，見到係錯字就會想擦咗佢，見到有嘢唔啱就要即刻去改咗佢，我哋好多時都會將呢一套放咗落教育度。我記得響我教書嘅時候，我嘅澳洲外藉同事同我講唔明點解香港人咁鍾意用擦膠，有錯咪劃咗佢再寫過，而唔係擦走佢好似冇發生過咁。因為呢個approach會令小朋友以為人哋唔知佢錯咗，掩過就以為可以過到骨。

於我來說，其實最重要嘅係比小朋友知道佢錯啲乜野，比佢知嘅方法有兩種：一、我哋大人話俾佢聽佢錯咗啲乜；二、等佢哋自己發現自己問題所在，產生內在因素/動力 去改變自己嘅行為。而我好深信，俾佢哋自己發現問題，記憶一定深刻過我哋大人話佢哋，所以我嘅教學方法都偏向要俾小朋友自己發現自己嘅錯處，等佢哋明白、吸收，咁就會學得好快了。

信心，響小朋友至青少年階段，除咗佢哋自己從經驗中累積之外，其實或多或少都係我哋成人比佢哋嘅。多稱讚，多鼓勵（不過一定要睇返小朋友性格），比空間佢哋自己Explore，久而久之，小朋友就會自信滿滿啦！

不過，Year6 寫到呢個Classification，我不禁要說一聲：你哋好叻呀！

Facebook: https://www.facebook.com/bigtreeiwb

Instagram: bigtree_sandra